Somos unha asociación enfocada no uso da cultura para a transformación social. Traballamos por e dende o Baixo Miño (actuamos localmente), cara o resto do mundo (pensamos globalmente).
Empregamos metodoloxías teatrais e ferramentas de educación non formal para facilitar o acceso á cultura e á formación da mocidade e a veciñanza da comarca.
Buscamos promover a inclusión social, a creatividade, as artes, os dereitos culturais, a cidadanía activa, o respecto á diversidade e outros valores de xustiza social.
Cooperamos con entidades europeas e do resto do Estado español para acadar os nosos obxectivos.
Priorizamos a calidade, relevancia, utilidade e dinamismo dos proxectos.
Pero… de onde saímos?
Aínda que temos a nosa sede na Guarda (Pontevedra), FOCO como asociación foi cociñándose paseniño dende distintos puntos de Europa e dende diversas experiencias profesionais e vitais. Aterramos aquí no 2021, e dende entón enfocámonos no traballo local: formamos parte do tecido asociativo miñoto e involucrámonos na nosa comunidade.
E que facemos?
Desenvolvemos actividades teatrais e culturais na Guarda e no resto do Baixo Miño. Levamos a cabo obradoiros semanais de teatro, facemos laboratorios de creación, mostras escénicas… poñendo sempre o foco no proceso participativo na creación das nosas pezas, unha metodoloxía levámola a todos os proxectos que levamos a cabo.
Traballamos dende os principios da educación non formal, isto é, a educación que se realiza dun xeito voluntario, fóra do sistema educativo regrado, baseada na experimentación en primeira persoa e o desenvolvemento de competencias. Neste tipo de educación, cada quen responsabilízase da súa propia aprendizaxe: en lugar de exames e cualificacións, realízanse procesos de reflexión persoal (individual e colectiva) sobre os coñecementos e destrezas adquiridas.
Contamos ademais cunha rede extensa de socios internacionais, e levamos a cabo encontros teatrais e educativos por toda Europa, compartindo o noso traballo e aprendendo doutras formas de traballar no eido cultural noutros lugares.
Porque ademais do noso traballo local, tamén traballamos nestas áreas:
Formación
Ofrecemos obradoiros e formacións tanto puntuais coma prolongados no tempo. Traballamos decote coa infancia e mocidade, pero tamén co resto da veciñanza. Ofrecemos tanto cursos predeterminados (que poden ser contratados por asociacións, colectivos, empresas…) coma formación ad hoc deseñada especialmente con contidos, duración, metodoloxías para ti.
Proxectos Europeos
Colaboramos con outras entidades, organizacións e institucións europeas para por en común coñecementos, metodoloxías e experiencias. Isto significa que ás veces viaxamos e ofrecemos a posibilidade de viaxar, ás veces acollemos na Guarda socias viaxeiras, e ás veces cooperamos na distancia compartindo o que facemos aquí e aprendendo do que se fai por alá.
Consultoría
Asesoramos a outras organizacións, empresas, entidades, etc. Temos moito percorrido nas distintas fases que imbrican o paso dende unha idea a un proxecto. Dende o diagnóstico, a conceptualización, a redacción de solicitudes de subvencións, a implementación e coordinación, avaliación e xustificación final… sabemos o denso que é o proceso e estamos aquí para acompañarte.
O noso equipo
Persoal da asociación
Xunta Directiva
