Asociación enfocada no uso da cultura para a transformación social.
Somos unha asociación enfocada no uso da cultura para a transformación social. Traballamos por e dende o Baixo Miño (actuamos localmente), cara o resto do mundo (pensamos globalmente).
Empregamos metodoloxías teatrais e creativas e ferramentas de educación non formal para facilitar o acceso á cultura, participación e á formación da mocidade e a veciñanza da comarca. Todos os nosos proxectos están deseñados para potenciar a aprendizaxe activa, reflexión e as conexión comunitarias.
Buscamos promover a inclusión social, a creatividade, as artes, o intercambio cultural, a igualdade, os dereitos culturais, a cidadanía activa, o respecto á diversidade e os valores da xustiza social. Cooperamos con entidades europeas e do resto do Estado español para desenvolver proxectos con impacto real local, priorizando sempre a calidade, relevancia, utilidade e dinamismo dos proxectos.
Pero… de onde saímos?
Aínda que temos a nosa sede na Guarda (Pontevedra), FOCO como asociación foi cociñándose paseniño dende distintos puntos de Europa e dende diversas experiencias profesionais e vitais, todas elas comprometidas coa cultura, o comunitario e o social. Aterramos aquí no 2021, e dende entón enfocámonos no traballo local: formamos parte do tecido asociativo miñoto e involucrámonos na nosa comunidade.
E que facemos?
Desenvolvemos actividades teatrais, culturais, educativas e comunitarias na Guarda e no resto do Baixo Miño. O noso traballo inclúe obradoiros semanais de teatro, laboratorios de creación, mostras escénicas, proxectos artísticos e iniciativas que poñen sempre o foco na participación, creatividade e aprendizaxe colectiva.
Traballamos dende os principios da educación non formal, isto é, a educación que se realiza dun xeito voluntario, fóra do sistema educativo regrado, baseada na experimentación en primeira persoa e o desenvolvemento de competencias. Neste tipo de educación, cada quen responsabilízase da súa propia aprendizaxe: en lugar de exames e cualificacións, realízanse procesos de reflexión persoal (individual e colectiva) sobre os coñecementos e destrezas adquiridas.
Contamos ademais cunha rede extensa de entidades socias internacionais, coas que levamos a cabo encontros teatrais e educativos por toda Europa, compartimos boas prácticas, experiencias, oportunidades de mobilidade e cooperación e o noso traballo e aprendendo doutras formas de traballar no eido cultural noutros lugares.
Paralelamente ao noso traballo local, realizamos actividades formativas, proxectos de cooperación europeos, e servizos de consultoría para organizacións interesadas na transformación social, participación, cultural e desenvolvemento comunitario.
As nosas áreas de traballo
En FOCO integramos no noso traballo formación, proxectos europeos e servizos de consultoría. Deseñamos iniciativas que conectan as realidades locais coa cooperación internacional, sempre co foco na participación, inclusión, creatividade e impacto social.
Formación
Organizamos obradoiros e experiencias formativas para mocidade, profesionais da cultura e a educación, asociacións e colectivos comunitarios. As nosas actividades céntranse na creatividade, participación, educación non formal, traballo comunitario e xestión cultural.
Proxectos Europeos
Colaboramos con entidades europeas e internacionais a través de programas de cooperación coma Erasmus+. Os nosos proxectos promoven a mobilidade, aprendizaxe intercultural, creatividade, inclusión social e intercambio de experiencias e metodoloxías.
Consultoría
Ofrecemos servizos de consultoría e apoio a organizacións, asociacións e institucións interesadas en desenvolver proxectos culturais, educacionais ou europeos. Acompañamos o proceso completo, dende o deseño ata a implementación e avaliación.
Recoñecementos
1º Premio á Iniciativa Empresarial dos Premios Provinciais á Xuventude de Deputación de Pontevedra.
Boa Práctica Europea do programa Erasmus+ outorgado ao proxecto DAFSI (Drama Activities For Social Inclusion, 2022)
Boa Prática Municipal de Participação Juvenil da Federação Nacional das Associações Juvenis de Portugal (FNAJ) outorgado ao proxecto O Río que Nos Une (2023)
O noso equipo
En FOCO contamos cun equipo diverso e multidisciplinar, que combina experiencias en educación, xestión cultural, arte, investigación e proxectos de cooperación europea. Cremos no traballo colaborativo, na creatividade e a participación comunitaria coma elementos clave para a transformación social.
Persoal da asociación
Entre o noso persoal contamos con persoas especializadas nos eidos do teatro, a educación, a facilitación cultural, a investigación e a xestión de proxectos europeos. Cada integrante contribúe coas súas experiencias, perspectivas e creatividade para desenvolver iniciativas locais e internacionais.
Xunta Directiva
A Xunta Directiva coordina e supervisa os proxectos e actividades da asociación, asegurando a calidade, relevancia e impacto social de todas as nosas iniciativas.
Sección xuvenil (Artífices)
FOCO conta cunha sección xuvenil nomeada Artífices e na que participan as persoas socias de entre 14 e 30 anos. Neste espazo promóvese a participación da mocidade en actividades culturais, educativas e artísticas, a través da creatividade, o traballo en equipo e a creación e sostemento da comunidade. Para saber que están a tramar, podedes clicar na seguinte imaxe:
